Minnekvadet var gjengitt i Vassvøri Sogelag sitt sogeskrift "Frå fjell til fjord" i 1998, samt i Målmannen nr 2/2003.
Minnekvad til Per Sivle
av Lars L. Tyssen
Minnast vil han, Sivleguten,
gjenom lange Framtidsdag.
Upp han steig på høgste Nuten,
gav oss Kvad av egte Slag.
Desse med sin fulle Rett
klinga vil frå Ætt til Ætt,
til sitt rette Rum dei finna
Norig rundt hjå Mann og Kvinna.
No er Skalden heiltupp tagnad,
komen er han i si Grav.
Han fekk altfor liten Fagnad
for det Gull som han oss gav.
Tungt han stridde, vond han leid,
djupe Sår i Barmen sveid.
Og hans Gråt den såg visst ingen,
- var åleine um den Tingen.
Norig sårt no honom saknar,
til hans Kvad me hadde trong.
Berre bid til Folket vaknar, -
vakna vil dei visst ein Gong.
Då skal alle greidleg sjå:
Sivle var heilt framifrå!
Gjævt var det han kunde gjeva,
Minnet hans vil lenge leva.