Svolder
(Per Sivle)
Der låg attum Svolder
øy på lur
ein skog av master,
av skrog ein mur;
svia-konungen,
dana-drotten,
og Eirik Jarl
var au i dotten.
— For stødt der nordmenn
lyt vera med,
når Noregs merke
skal hoggast ned.
Og Trygvason visste kje
ord tå deim.
Han kom ifrå Vendland
og siglde heim,
på grepa skutor,
men færre enn mange.
— Og Olav sjølv
styrde "Ormen lange."
Og raustare menn,
enn han hadde no,
hev Noreg aldri
sendt ut på sjo.
Dei seig um odden.
Og då dei såg
den skog og mur,
som bak Svolder låg,
då ropte han Olav:
"Lat segli falla!
Redde, det skal dei oss
aldri kalla!
Og er dei Tylfti
mot ein — — so visst
me treng dess minder
å skjota i mist!"
So bar det laust
med det Svolder-slag,
som dyn i vår soga
den dag idag.
Og danar og sviar
hamla tilbaka,
sosnart dei fekk „Ormens"
tenner å smaka.
— Men då so og jarlen
kom til med si her,
vart brodde-bylgja
„Ormen" for svær.
Og Trygvason høgt
i si lyfting stod;
og ned under brynja hans
draup der blod.
Då sa han: "Til dauden
er kvar mann saka.
Og livande skal dei
meg aldri taka."
— So bykste han med
sine menn uti hav.
Og fri, som han livde,
han sokk i si grav.